6. తంబరహళ్ళి కరణం గారికి సంతాన భాగ్యమును కలుగచేయుట

రాయచూర్ జిల్లాలో “తంబరహళ్ళి” అను గ్రామము కలదు. ఆ గ్రామమునకు కరణముగా ఉండిన బ్రాహ్మణ వంశస్థులు వీరప్ప అను అతనికి సంతానము లేకపోయెను. వీరప్ప ఎన్నో విధాలుగా దైవకార్యాలు చేసిననూ, దేవతలను ప్రార్థించిననూ సంతానము కలుగలేదు. వారు ఇక తమకు సంతానం కలిగే భాగ్యమే లేదా అని బాధపడేవారు. అపుడు భీమలింగేశ్వరస్వామి వారి మహిమల గురించి అక్కడక్కడా  చెప్పుకొనడం విని వారు గడేకల్లుకు వచ్చారు. స్వామివారితో తమ ఆవేదన చెప్పి సంతానము కోసం వేడుకున్నారు. అంతటా స్వామి వారిని ఆశీర్వదిస్తూ సంతానప్రాప్తి తప్పక కలుగును (సంతాన సిద్ధి ప్రాప్తిరస్తూ) అని దీవించి, తన వద్ద ఉన్న ఒక అరటిపండును తీసి కరణం భార్యకు ఇచ్చారు. భార్యాభర్తలిరువురూ స్వామి వారికి పాదాభివందనము చేసి వెళ్ళిపోయారు. తరువాత కొంతకాలానికి వీరప్ప భార్య గర్భమును ధరించినది. నవమాసాలు నిండిన తర్వాత ఒక పుత్రుడిని ప్రసవించింది. స్వామి అనుగ్రహము వలననే సంతానము కలిగినందుకు ఆ అబ్బాయికి స్వామివారి పేరైన “భీమలింగ” అని నామకరణము గావించారు. తమ కోరిక నిరవేరినదని తమ యోగ్యతకు తగిన విధంగా సత్పురుషులకు దానధర్మాలు చేసి చాలా ఆనందముగా ఉండేవారు.